"Бір ел - бір кітап" акциясы



21 ақпанда ҚР Ұлттық академиялық кітапханасында 2013 жылы халық жаппай оқитын кітапты таңдау үшін «Бір ел – бір кітап» акциясының ұйымдастыру комитетінің отырысы болып өтті. Ол акцияның ұйымдастыру комитетінің төрағасының орынбасары, жазушы, Мемлекеттік сыйлықтың лауреаты Әкім Таразидың жетекшілік етуімен өтті. 

Талқылауға ұйымдастыру комитетінің мүшелері – ҚР Парламенті Сенатының депутаты, академик Ғарифолла Есім, жазушы, филология ғылымдарының докторы, профессор Тұрсын Жұртбай, «Дарын» Мемлекеттік жастар сыйлығының лауреаты, Л.Н.Гумилев атындағы Еуразия ұлттық университетінің проректоры, филология ғылымдарының докторы, профессор Дихан Қамзабекұлы, жазушы, Мемлекеттік сыйлықтың лауреаты, ҚР Ұлттық академиялық кітапханасының бас директоры Әлібек Асқар, ақын, «Дарын» Мемлекеттік жастар сыйлығының лауреаты, ЕҰУ «Алаш» мәдени және рухани даму институтының директоры Амантай Шәріп, аудармашы-жазушы, Мәдениет қайраткері Ақайдар Ысымұлы, Л.Н.Толстой атындағы Қостанай облыстық әмбебап ғылыми кітапханасының директоры Гүлжамерия Қазина, жазушы, «Дарын» Мемлекеттік жастар сыйлығының лауреаты Айгүл Кемелбаева, ақын, «Дарын» Мемлекеттік жастар сыйлығының лауреаты Дәулеткерей Кәпұлы қатысты.
Талқылауға Ғабит Мүсіреповтың «Ұлпан» романы, Сәкен Сейфуллин поэзиясы, Міржақып Дулатовтың «Бақытсыз Жамал» романы, Фариза Оңғарсынованың өлеңдері, Мұқағали Мақатаевтың лирикасы, Сайын Мұратбековтың «Басында Үшқараның...» атты прозалық шығармалары, Сәкен Жүнісовтың «Ақан сері» романы, Саттар Ерубаевтың «Менің құрдастарым» романы, Ілияс Жансүгіровтың «Құлагер» поэмасы, Әбдіжәміл Нұрпейісовтың «Қан мен тер» трилогиясы енген еді. Талқылау барысында қазақ әдебиетінің классикалық шығармасы ретінде оқылуға лайық осынау әрбір шығарманың құндылықтары туралы айтылды. Алайда ұйымдастыру комитеті мүшелерінің көпшілігі өз дауыстарын Қазақстанның халық жазушысы, Мемлекеттік сыйлықтың лауреаты Фариза Оңғарсынованың поэзиясы үшін берді. Акцияның кітабы ретінде ақынның «Дауа» атты лирикалық жыр кітабы ұсынылды.
Бүгінде Фариза Оңғарсынова Қазақстанның ең көп оқылатын авторы болып саналады. Оның шығармашылығының негізгі тақырыптары – сүйіспеншілік пен жек көрушілік, ерлік пен қорқақтық, жақсылық пен жамандық. Өзінің көптеген өлеңдерін ақын туған ауылына, жерлестеріне және бүкіл қазақстандықтарға арнады. Фариза Оңғарсынованың шығармаларына әлеуметтік пен азаматтық тән, ақын жырлары отансүйгіштік рухты оятып, туған халқын сүюге, құрметтеуге, оның дәстүрлері мен мәдениетін қастерлеуге шақырады. Фариза Оңғарсынова әлі күнге қазақстандық поэзияның дамуына өз үлесін қосуда: ол «Тұмар» атты республикалық-көркем журналдың бас редакторы болып табылады, сонымен қатар жас талантты әдебиетшілерді қолдайды.
Жыл бойына Ж.Молдағалиев атындағы облыстық ғылыми-әмбебап кітапханада ,және облыстық, аудандық және ауылдық кітапханаларда, әртүрлі оқу орындары мен мектеп  кітапханаларында Фариза Оңғарсынованың шығармашылығына арналған іс-шаралар өтетін болады. Акцияға жыл сайын білім беру мекемелері, сондай-ақ әскери бөлімдер қатысады.



















































2 комментария:

  1. Султанова Луиза оқырман27 октября 2013 г. в 03:03

    «Бір ел – бір кітап» акциясы Абайдың «Қара сөздерімен» басталып, Мұхтар Әуезовтың «Қилы заман» романына, Мағжан Жұмабаевтың махаббат жырларына, Жұбан Молдағалиевтың «Мен – қазақпын », Жүсіпбек Аймауытовтың «Ақбілек» романына арналса, былтырғы жылы жазушы Оралхан Бөкейге арналған болатын.
    Ал биылғы жылы «Бір ел-бір кітап» акциясы аясында ел болып оқуға Қазақстанның Халық жазушысы, ҚР Мемлекеттік сыйлықтың иегері, ақын, көсемсөзші, аудармашы Фариза Оңғарсынованың «Дауа» жинағы таңдап алынды.
    Ақын өлеңімен өрнектелген өнегелі өмірі, жүйрік ой, жүрдек қаламынан туған жалынды жырларына арналған мына блог маған қатты ұнап тұр! Жұмысын жемісті болсын,Айнара

    ОтветитьУдалить
  2. Қажғалиев Азамат,оқырман27 октября 2013 г. в 04:13

    Бұл блогтан Ж. Молдағалиев атындағы облыстық ғылыми-әмбебап кітапхана сайтына тікелей кіру мүмкіндігі бары маған қатты ұнады.Фариза апамыздың шығармашылығына арналған блог мен үшін өте коп мәлімет берді,мен бұл блог арқылы уақытымды үнемдеп, аз уақытта мол ақпарат алғаныма ризамын, Рахмет Сізге Айнара апай осындай блог құрғаныңызға!

    ОтветитьУдалить